Día da usuaria/o da Biblioteca de Galicia

Só nunha parte moi reducida da Biblioteca e Arquivo de Galicia se permite o acceso ao público. A entrada no resto das áreas atópase restrinxida por motivos técnicos e de seguridade, pero mañá venres ás 12 horas abrirase unha oportunidade excepcional para explorar estas zonas reservadas e coñecer os segredos desta institución gardiá da nosa memoria.

Incunables, mapas antigos, unha das mellores coleccións de facsímiles, prensa histórica, exemplares de toda canta obra se publica en galego ou por autores galegos... fondos de valor incalculable preservados en depósitos con tecnoloxía de última xeración, nun dos edificios con máis forza arquitectónica da Cidade da Cultura. Con motivo do Día do Usuario e Usuaria das Bibliotecas, convidámosvos a participar nunha visita onde o persoal técnico da Biblioteca de Galicia descorrerá as cortinas que ocultan a intensa actividade desta biblioteca de bibliotecas.

  • Ademais, agasallaranse libros ás persoas que se acheguen entre as 8 e as 21 horas, contos e novelas tanto para público adulto como para a cativada.

  • LEMBRA: Visita comentada á Biblioteca de Galicia: 12 h. do venres 11 de xaneiro. De balde e sen inscrición. Punto de encontro a carón do mostrador de entrada.

Santiago de Compostela, 10 de Xaneiro de 2020