EAN 2026 | Publicada a listaxe das persoas seleccionadas para participar no Encontro de Artes Novas

Xa está publicada a listaxe provisional cos nomes das creadoras e creadores emerxentes seleccionados para participar no Encontro de Artes Novas Cidade da Cultura de Galicia, EAN 2026. Durante catro días —do 1 ao 4 de setembro—, as persoas participantes compartirán procesos de traballo, metodoloxías e preguntas ao redor da práctica artística contemporánea nun contexto que favorece a escoita, a interlocución e a reflexión colectiva.

Coa dirección de Chus Martínez Domínguez, o programa do EAN 2026 artéllase a través da presentación pública de proxectos, de conversas con artistas e de espazos de traballo compartido. Estes formatos están pensados para activar relacións entre prácticas diversas e para abrir contextos de aprendizaxe mutua entre artistas emerxentes e tamén figuras consolidadas como Sonia Fernández Pan, Pablo Sanguinetti, Laura Tabarés, Jacobo Bugarín, ou a dupla artística Clo-Plas, integrada por Xiana Arias e Berio Molina. O programa do EAN inclúe ademais un encontro para coñecer experiencias e prácticas desenvolvidas en MediaLab Matadero, como espazo de referencia na creación contemporánea actual.