A Cidade da Cultura de Galicia foi deseñada polo arquitecto norteamericano Peter Eisenman, tras un concurso internacional ao que se presentaron doce proxectos. Elixido pola súa singularidade tanto conceptual como plástica e a súa excepcional sintonía co lugar onde se alza, Eisenman concebiu o proxecto do Gaiás como unha urbe propia.
Inspirándose no casco histórico de Compostela e as cinco rutas de peregrinación da cidade medieval que conducen á catedral, o arquitecto trasladou esta cuadrícula ao cumio da montaña. Partindo deste concepto, o proxecto orixinal consta de seis edificios conectados por rúas e unha praza como punto de unión evocando o motivo da vieira, como símbolo da peregrinaxe.
Actualmente están rematados catro edificios:
- O Centro de Emprendemento Creativo de Galicia
- A Biblioteca e Arquivo de Galicia
- O Museo Centro Gaiás
- Centro de Innovación Cultural (CINC)
O proxecto orixinal de Eisenman inclúe dous edificios máis: o Centro da Música e das Artes Escénicas e o Centro de Arte Internacional. As obras destes dous edificios atópanse temporalmente paralizadas.