Descifrando os nomes do Faraón, fillo de Re, amado de Amón

Neste fragmento de relevo exposto no Gaiás pode lerse un dos títulos máis habituais que recibía o Faraón. Adiviñades cal é? Trátase de Fillo de Re (ou Ra, o deus do Sol), amado de Amón, e refírese ao nomen ou nome de nacemento, un dos cinco nomes que tiña o gobernante do Antigo Exipto (xunto ao Praenomen, o nome de Horus, o nome de Nebty e o Horus de ouro).

Comprender os nomes e titulatura do Faraón é unha das cousas que aprenderedes este sábado 8 de maio no noso webinario de introdución á escrita xeroglífica, conducido polo exiptólogo César Guerra (@EscribaFrustrado). Nesta actividade emitida exclusivamente en liña ides entender o funcionamento destes textos milenarios e as principais claves para descifralos: o sentido de lectura, os principais signos xeroglíficos, a transliteración ou os diferentes sistemas de escritura son algúns dos contidos que trataremos.

As pezas exhibidas en Faraón. Rei de Exipto, servirán como porta de entrada para iniciarse no apaixonante mundo dos xeróglifos exipcios e tamén comprender o sistema cultural, relixioso e artístico que rodeaba a figura do Faraón.

LEMBRA: Sábado 8 maio | 12 h | En streaming: https://youtu.be/PEzlqtK02MU 

O webinario enmárcase no programa de actividades ao redor da exposición Faraón. Rei de Exipto, do que tedes cumprida información premendo AQUÍ.

Santiago de Compostela, 04 de Maio de 2021