A castaña de Cela

Un ollo de vidro, un reloxo do Celta de Vigo e unha castaña. Tras un impresionante cadro de Camila Trulock e algunhas imaxes de infancia e mocidade, a exposición Camilo José Cela 1916-2016. O centenario dun Nobel. Un libro e toda a soidade sorpréndenos cunha pequena vitrina que combina estes tres curiosos obxectos de Cela.

Segundo contaba o novelista, o ollo de vidro gañouno nunha partida de cartas durante a Guerra Civil nun bar de Estremadura a un home que xa non tiña máis que xogarse. E o reloxo do Celta é un regalo do seu pai, un dos socios fundadores do equipo vigués. E a castaña, un legado familiar. Quizáis, de todos, o máis importante pola íntima historia que agocha detrás.

A castaña, engarzada nun anel de ouro, acompañou a Cela toda a vida. O froito atopouno o seu pai, Camilo Crisanto Cela y Fernández, nunha praia e acompañouno no peto como amuleto da sorte. A súa morte, a súa muller decidiu entregarllo ao seu fillo maior: Camilo José Cela. Conta a lenda que, nada máis recibila, a castaña caeu ao chan e partiu. Para conservala, Camilo José Cela decidiu engarzala nun anel de ouro, tal e como pode verse na exposición, acompañándoo tamén durante toda a súa vida.

Podedes descubrir máis historias como estas durante as visitas comentadas á exposición, que teñen lugar de martes a domingos ás 18:30 horas e sábados, domingos e festivos tamén ás 12:30. A entrada é de balde e non fai falta reservar, tan só achegarse ao mostrador do Museo Centro Gaiás uns minutos antes do comezo do percorrido.

Exposicións & Intervencións
Santiago de Compostela, 24 de Novembro de 2016
Castaña de Camilo José Cela