Aínda non coñeces o Atardecer na Cidade da Cultura?

A maxia do lusco e fusco agárdate de novo esta fin de semana. A praza da Cidade da Cultura converterase no escenario perfecto para gozar das anoitecidas de verán nunha contorna privilexiada ao ritmo da mellor música e dunha suxerente proposta poética.

Hoxe xoves, 11 de agosto, DJ Ino, respectado no mundo clubbing e considerado un “mago das mesturas imposibles”, fará as delicias dos amantes da música electrónica. Afincado na Coruña, DJ Ino é o fundador do selo discográfico House Café Music e integrante do colectivo neoiorquino “Funky Soul Rebels”.

O venres 12 é a quenda da música, compositora e poetisa Ugía Pedreira, que estará acompañada polo cantautor brasileiro Fred Martins. O dúo presentará o espectáculo “Acróbata”, un repertorio onde se conxugan a lingua galega e a portuguesa.

Outro dúo galego-brasileiro, o formado por Najla Shami e Serginho Sales, versionarán o sábado 13 os grandes temas da historia da música brasileira no espectáculo “Teu e Meu”, que encherá de emoción a Cidade da Cultura.

Alguén dá máis?

Música & Escena
Santiago de Compostela, 11 de Agosto de 2011