Da tábula á tablet: o libro e as bibliotecas a través do tempo

“Sempre imaxinei que o Paraíso sería algún tipo de biblioteca”

Jorge Luis Borges

 

Este Nadal, a escritura será a protagonista na Biblioteca de Galicia. Será a través dos obradoiros Da tábula á tablet: O libro e as bibliotecas a través do tempo, un percorrido polo mundo da transmisión do coñecemento, desde as súas orixes (papiro, tábula, cerata…), pasando polo audiovisual e rematando con contidos axeitados para una educación atractiva nas novas tecnoloxías: os interactivos.

Da tábula á tablet arrancará o sábado 20 de decembro cunha atractiva viaxe pola historia da escritura: desde os xeroglíficos exipcios á Biblioteca de Alexandría, a tábula romana, a chegada da imprenta e o e-book actual. Ademais de poder contemplar exemplares, recreacións e imaxes sobre a historia da escritura, os participantes no obradoiro A escritura na historia poderán traballar con tábulas e stylos, experimentando a sensación de crear a escritura esculpindo en cera.

Ao día seguinte, domingo 21 de decembro, descubriremos a imprenta. Os participantes en Do maxín á imprenta poderán seguir todo o proceso de creación dun libro: dende que se recibe o texto ata a elaboración do storyboard, as probas de maquetción, os pregos de imprenta e o producto final.

O último destes tres obradoiros abordará a escritura en imaxes a través do cine. En Contos en movemento, os participantes visionarán unhas curtas baseadas en relatos e analizarase cada peza para lograr entender  como os directores realizan as súas películas a través das distintas partes do film: o guión, a composición dos fotogramas, os tipos de planos, as secuencias…

Os tres obradoiros Da tábula á tablet están pensado para nenos de 8 a 12 anos, terán dúas horas de duración e arrancarán todos ás 17 horas na Biblioteca de Galicia. A entrada é de balde mais é preciso inscribirse previamente en cada un dos obradoiros (cada actividade é independiente, de forma que o neno que queira participar nunha só terá que inscribirse na que desexe. No caso de querer participar nas tres, terá que inscribirse nas tres).

En familia
Santiago de Compostela, 09 de Decembro de 2014