O Consello da Xunta vén de dar o seu visto e prace ao terceiro informe de contabilidade social da Cidade da Cultura de Galicia, que estima que esta institución xera á sociedade un valor total de 23,92 millóns de euros. Neste balance, que analiza datos do ano 2024, reflíctese un incremento respecto ao informe anterior (correspondente a 2022), que cifraba este retorno en 23,65 millóns de euros.
O festival de danza, teatro e arte en acción Escenas do cambio, organizado pola Xunta de Galicia, trae á Cidade da Cultura e ao Salón Teatro catro días de encontro coa vangarda escénica nacional e internacional. Un total de once espectáculos (dez deles inéditos en Galicia, con tres estreas absolutas e outras tres estreas en España de co-producións internacionais), forman a programación desta 12ª edición, que decorrerá do xoves 7 ao domingo 10 de maio.
A Xunta acaba de abrir o prazo de inscrición para a VI Residencia literaria da Cidade da Cultura. Unha iniciativa da Consellería de Cultura, Lingua e Xuventude para impulsar o talento de escritores e escritoras emerxentes en Galicia no ámbito da narrativa, a poesía e o teatro. As persoas interesadas poderán enviar as súas candidaturas ata o 22 de maio.
O conselleiro de Cultura, Lingua e Xuventude, José López Campos, e o presidente da Real Academia Galega de Belas Artes, Manuel Quintana Martelo, presentaron no Museo Centro Gaiás a reedición de José Suárez. Uns ollos vivos que pensan, a publicación da exposición homónima organizada pola Cidade da Cultura en 2015 e considerada a máis ambiciosa ata o momento sobre o fotógrafo ao que este ano se lle dedica o Día das Artes Galegas.
A Xunta de Galicia vén de lanzar unha nova convocatoria do Encontro de Artes Novas Cidade da Cultura de Galicia, EAN, que ofrece a 28 artistas, investigadores e profesionais emerxentes do sector cultural a oportunidade de convivir durante catro días no Gaiás para amosar o seu traballo, compartir prácticas, metodoloxías e inquedanzas. Esta edición pon especial atención á intersección entre arte e tecnoloxía e lanza a primeira convocatoria da Residencia Artística EAN, dirixida a apoiar proxectos de creación ou investigación neste ámbito.