A edición foi unha das paixóns de Camilo José Cela xunto coa de coleccionista. O papel como editor e director de revistas culturais é un episodio fundamental na biografía do Nobel, tal e como pode comprobarse na exposición Camilo José Cela 1916-2016. O centenario dun Nobel. Un libro e toda a soidade, que pode visitarse no Museo Centro Gaiás ata o 19 de febreiro.
Camilo José Cela coñeceu, tratou e mesmo trabou amizade con grandes nomes das letras españolas e internacionais. Mantivo contacto con todos os escritores da diáspora, de Alberti a Eduardo Blanco Amor; compartiu mesa e mantel con John dos Passos, Ernest Hemingway ou Arthur Miller; editou a todos os autores en activo da súa época –a excepción de Delibes- e coñeceu a practicamente toda a Xeración do 27. A todos excepto un: Federico García Lorca. Sen dúbida, xunto con Pío Baroja, o escritor favorito do Nobel galego e cuxas obras pasan a ser de dominio público neste 2017.