O secretario xeral de Cultura, Anxo M. Lorenzo, visitou hoxe na Cidade da Cultura Memoria dunha década, a mostra impulsada pola Xunta no marco do décimo aniversario do Arquivo de Galicia. Trátase dunha exposición que fai un percorrido polo traballo desta entidade desde a súa creación, no ano 2010, e que se pode contemplar ata o vindeiro 16 de outubro no Edificio da Biblioteca e Arquivo de Galicia.

O Museo Centro Gaiás comezou xa a recibir as primeiras das arredor de 300 obras que comporán a exposición Galicia, de Nós a nós, a máis completa e ambiciosa mostra realizada ata o de agora sobre a Xeración Nós e proxecto central da programación que a Xunta de Galicia desenvolve con motivo do centenario da publicación da revista que lle dou nome –que se conmemora este outono–.

A Cidade da Cultura de Galicia afonda hoxe sobre o contexto actual na música, nas artes e na vangarda das industrias culturais no seu conxunto a través do encontro WOS Talks x Fest Galicia: Futuro_Presente, a única actividade que o WOS Festival celebra este ano debido á situación sanitaria provocada pola covid-19. O evento ten un formato híbrido, podendo seguirse tanto de xeito presencial no Gaiás –cumprindo con todas as medidas de distancia social e protección– como en liña.

A Fundación Cidade da Cultura retoma esta tarde as sesións formativas programadas no segundo Obradoiro de Novela Cidade da Cultura coa clase maxistral da escritora Arantza Portabales. A programación, que arrancara o pasado mes de marzo e tivera que ser adiada por mor do estado de alarma, continuará a desenvolverse ata o 23 de outubro con outras oito sesións teóricas da man de autores e autoras de éxito e profesionais do mundo editorial.