Volve o mellor cine miúdo á Cidade da Cultura coa sexta edición de Pequefilmes. O festival de curtametraxes infantís consolida a súa oferta e proxección internacional cunha amplísima selección de filmes de animación e imaxe real no que teñen cabida todos os estilos e xéneros.

Mergúllate no pulo creativo dos mozos e mozas galegas dos últimos anos coas visitas comentadas á mostra Xuventude Crea, máis dunha década. Unha mirada ao pasado, unha mirada ao futuro, unha escolma de pezas de moda, graffiti, banda deseñada, artes plásticas, fotografía ou deseño de xoias que se teñen presentado ao abeiro deste certame.

A Biblioteca de Galicia, con motivo da conmemoración do Día da Ilustración, organiza a actividade Descubre e colorea os seres máxicos galegos, a cargo da ilustradora Paula Mayor e a contocontos A cuentista trapecista. Trátase dun obradoiro no que a cativada poderá descubrir as lendas dos seres fantásticos que habitan Galicia dende tempos remotos e darlle vida con pinturas a unha serie de personaxes para que poidan poboar o bosque.

Neste segundo trimestre do curso escolar 21-22, dende o Gaiás propoñémosvos un programa didáctico arredor da exposición O Camiño Portugués. Lembranzas de mar e pedra, que inclúe visitas presenciais e en liña á exposición, así como unha divertida actividade didáctica (tamén presencial) pensada para alumnado de primaria.