Este ano, a cativada poderá converterse en cineastas por un día con dous obradoiros para deixar voar a imaxinación. Por unha banda, contaremos co obradoiro de cinema e teatro de sombras chinesas impartido por Iria Fafián. Tamén haberá unha proposta da man de Belén Veleiro para descubrir e experimentar co primeiro dispositivo que existiu no cinema de animación, o zootropo, e que os nenos e nenas poidan crear a súa propia película.
Xa se achega o entroido! Para prepararse para unha das festas máis divertidas do ano, a Biblioteca de Galicia propón un obradoiro de elaboración de máscaras no que a cativada poderá dar renda solta á súa creatividade empregando materiais e técnicas accesibles e sostibles.
Continúa en febreiro o programa de visitas especiais á exposición Francisco Asorey, unha recuperación necesaria, desta volta comentadas por Miguel Fernandez-Cid, director do Museo de Arte Contemporánea (MARCO) de Vigo e comisario da mostra.
Os panos e mantóns do traxe galego eran unha das obsesións do escultor Francisco Asorey. O artista foi atesourando ao longo da súa vida unha boa colección, que moitas veces mercaba directamente á súa propietaria, para empregalos como referencias á hora de vestir en madeira as súas esculturas.
Como afecta á sociedade vivir entre o real e o virtual? Perdemos a humanidade e a empatía cando nos manipula o algoritmo? Que significa ter identidade sen corpo físico? A exposición Mundo expandido. Entre o físico e o virtual chega á Cidade da Cultura e lánzanos un feixe de interrogantes sobre os efectos da explosión dos mundos virtuais nas nosas vidas.
O I Encontro Profesional de Mulleres da Arte Urbana, EnredaDelas 2026, celebrarase os días 20 e 21 de febreiro na Cidade da Cultura, Santiago de Compostela, como un espazo de intercambio, formación e visibilización dirixido a mulleres profesionais do sector da arte urbana.
Este ano 2026, o Día da Ilustración celebra a creatividade e o humor de Siro López, un dos caricaturistas máis recoñecidos da nosa Comunidade. Para festexar a súa obra, a cativada poderá participar neste obradoiro no que collerán lápis e cores, deixarán voar a imaxinación e descubrirán que debuxar tamén pode ser un xogo cheo de diversión.
Pequefilmes celebra dez anos cunha selección das películas premiadas no festival ao longo desta década. Poderán verse catro sesións gratuítas nas mañás do sábado 28 de febreiro e do domingo 1 de marzo.
Un ano máis, Pequefilmes colabora co Festival Internacional de Curtametraxes Clermont-Ferrand, a cita máis grande do mundo dedicada ao cinema miúdo, para traer a Galicia unha escolma dos filmes que foron seleccionados nas últimas edicións do festival francés.
Siro non necesita presentación para quen segue a caricatura e o humor gráfico en Galicia. Desde as súas primeiras viñetas en revistas como Can sen dono ou Sapoconcho ata as páxinas de La Voz de Galicia, o seu debuxo alcanzou a vida diaria de miles de persoas, deixando sempre pegadas de humor. Este 2026, a Biblioteca de Galicia celebra o Día da Ilustración coa exposición Siro.
