Sor Juana Inés de la Cruz e Rosalía de Castro, figuras fundacionais das literaturas mexicana e galega, protagonizan os volumes 7 e 8 do ciclo Clásicas Desfeitas. Canta máis luz, máis sombra é o título deste díptico que se constrúe a partir do diálogo cruzado entre o Centro Dramático Galego (CDG) e a Compañía Nacional de Teatro de México (CNT). Ambas producións desenvólvense dentro do programa de Residencias Artísticas do Gaiás – REGA23.

O ciclo Clásicas Desfeitas comeza en 2023 tomando a figura da Antígona de Sófocles como punto de partida para reflexionar, desde o presente, sobre a lei, a transgresión e a xustiza. O director artístico de El Mura, Iván Solarich, reúne un elenco internacional formado por artistas de Galicia, Portugal e Uruguai para dar forma a esta renovada versión da traxedia grega dentro das Residencias Artísticas do Gaiás – REGA23.

Como nos ve a xente de fóra de Galicia? Nesta visita guiada á mostra Detrás do espello descubrirás, da man do noso equipo de guías, unha ollada diferente do noso país a través de recoñecidos nomes da literatura, as artes plásticas, a fotografía, o cinema, a ciencia e o pensamento, que desde diferentes recantos do mundo afondaron na realidade galega ou se deixaron inspirar por ela.

A Biblioteca de Galicia organiza o obradoiro A Casa das letras para celebrar o Día da Narración Oral. Nel, a cativada construirá de maneira sinxela os seus propios monicreques de cartón e papel, tendo as letras como protagonistas. Algunha vez pensaras que fan as letras mentres alguén as convida a participar nun conto? Agora podedes descubrilo visitando a súa casa.

O Gaiás convértese por décimo terceiro ano consecutivo nun espazo de encontro no que creadores e creadoras emerxentes teñen a oportunidade de dar a coñecer os seus traballos e debater ao redor da arte contemporánea durante catro días de convivencia e intercambio de coñecementos e ideas con outros axentes culturais. Chega o XIII Encontro de Artistas Novos, #EAN13, que se celebra do 27 ao 31 de agosto de 2023, coordinado unha edición máis por Rafael Doctor.