A Cidade da Cultura celebra o sábado 29 de abril o Día Internacional da Danza co espectáculo Bailador, unha peza de danza galega contemporánea na que Óscar Cobos Compañía de Danza pon en escena a nove bailadoras ao son das músicas de Berrogüetto para render unha dobre homenaxe: á raíz da nosa danza tradicional e á traxectoria dun grupo que soubo reinventar a música galega.
O Museo Centro Gaiás da Cidade da Cultura despide este domingo 16 de abril a exposición De lugares e cousas. Colección de Arte Banco Sabadell, unha mostra que percorre a evolución da arte contemporánea desde a segunda metade do século pasado ata os nosos días a través de 41 obras de 36 artistas entre os que se contan algunhas das figuras máis destacadas da creación plástica do século XX en Galicia, España e Portugal.
A Cidade da Cultura presenta un espectáculo circense familiar o sábado 22 de abril para conmemorar o Día do Circo —que se celebra o día 15— a cargo da compañía Cía. Carpa Diem, conformada por dous artistas italianos. Doppio Zero é unha función que combina diversas disciplinas como acrobacias sobre bicicleta, suspensión aérea sobre mastro, clown ou malabarismos.
Coincidindo coa Semana Santa, a Xunta de Galicia renova a instalación de realidade virtual do Galiverso na Cidade da Cultura, estreada hai xa varios meses, cunha nova proposta para descubrir o patrimonio galego oculto baixo as nosas augas.
A Cidade da Cultura de Galicia despide o domingo 9 de abril a exposición Camiños creativos, un percorrido pola relación entre arte e movemento desde o século XVIII ata os nosos días, que amosa no Museo Centro Gaiás obras de grandes mestres da pintura e da fotografía —desde Turner, a Constable, Courbet, Sorolla ou Cartier-Bresson— e referentes da creación contemporánea máis actual.
«O noso baile ten as raíces afundidas na terra.
Na mesma terra onde as bailadoras labramos as leiras do silencio»
Bailador é unha peza de danza galega contemporánea baseada nas músicas de Berrogüetto, unha obra coreográfica que rende unha profunda homenaxe á nosa danza de raíz e a un grupo que transformou o xeito de entender e interpretar a música tradicional.
Con motivo da celebración do Día do Mundial do Circo (15 de abril), a Cidade da Cultura organiza para o sábado 22 un espectáculo para gozar dunha tarde en familia a cargo da compañía Carpa Diem, que porá en escena a función Doppio Zero.
O espectáculo "Doppio Zero"
Con motivo da conmemoración do Día do Libro, terá lugar no Auditorio da Biblioteca de Galicia a función Sobre Sorpresa. Un espectáculo familiar a cargo do dúo Aldaolado cuxo fío condutor é unha reflexión sobre o fracaso na sociedade.
Lucía Aldao e María Lado caracterízanse pola súa particular forma de expresarse combinando poesía, música e humor na súa posta en escena.
Na recta final da mostra Camiños creativos, o creador Juanma González exercerá de gamemaster do seu xogo de mesa Peregrinos en Gotland para todas aquelas persoas que se animen a xogar con el unha partida. A actividade desenvolverase entre as 16 e 19 horas, na propia sala de exhibición, entre o 31 de marzo e o 9 de abril (excepto o luns 3, que permanecen pechadas as exposicións do Museo).
Benvidos ao Galiverso somerxido, unha viaxe única para descubrir o patrimonio galego oculto baixo as nosas augas. Desde o Museo Centro Gaiás, montados nun batiscafo e coa axuda das lentes de realidade virtual, exploraremos os fondos mariños da costa galega, aprendendo sobre a fauna e flora que habita neles, así como sobre episodios históricos singulares nos que o mar foi protagonista. Unha travesía que busca tamén concienciar sobre a importancia histórica, económica e medioambiental dos nosos mares e a necesidade de coidalos.
