Na noite do sábado 24 de xullo de 2021, os Fogos do Apóstolo lánzanse desde cinco localizacións diferentes de Santiago, entre elas o monte Gaiás (ademais das Fontiñas, a Alameda, o Restollal e as Cancelas). Para que o público poida contemplar o espectáculo pirotécnico, o recinto da Cidade da Cultura prolongará o seu horario habitual e tanto os aparcamentos como os espazos exteriores estarán abertos ata as 2.00 da madrugada.
Se hai algo que se contaxia dun xeito máis rápido e moito máis doado que a covid-19 é a risa. Son ben coñecidos desde hai tempo os seus efectos terapéuticos: reduce o estrés, favorece a dixestión e incrementa a produción de anticorpos dun xeito totalmente natural.
O conselleiro de Cultura, Educación e Universidade, Román Rodríguez, presentou hoxe o novo ciclo Comicamente, impulsado polas empresas Con de tres pés, Etiqueta Negra e Ainé Producións co apoio da Xunta de Galicia para levar o humor a 12 concellos da Comunidade desde finais de xullo a comezos de setembro. O proxecto, enmarcado na programación do Xacobeo 21-22, súmase ás iniciativas postas en marcha polo Goberno galego co obxectivo de contribuír á reactivación do sector cultural.
O presidente do Goberno galego, Alberto Núñez Feijóo, destacou hoxe na inauguración da mostra Galicia Futura a capacidade dos galegos para evolucionar a través do cambio tranquilo, capaz de sintetizar tradición e progreso.
“Evolucionamos constantemente. Cada día, cada momento, a sociedade, a cultura, a economía galegas transfórmanse e fano sen convulsións nin rupturas”, dixo, incidindo en que as transformacións máis fondas na esencia dunha comunidade son aquelas que involucran a todos os homes e mulleres que a compoñen, buscando nexos de unión entre eles.
A Xunta de Galicia apoia a unha vintena de artistas e creadores galegos destinando máis de 200.000 euros á creación de varias obras inéditas, realizadas ex profeso para a exposición Galicia futura, a mostra central deste Xacobeo 21-22 que se poderá ver na Cidade da Cultura a partir do vindeiro mércores 14 de xullo. Os proxectos desenvolvidos inclúen pezas audiovisuais, fotografías, obras plásticas, proxectos literarios ou ilustracións de gran formato.
Aínda que podes visitar Galicia futura con entrada libre e de balde, se queres unha experiencia máis completa podes reservar praza para as nosas visitas comentadas. O equipo de guías da Cidade da Cultura de Galicia ofreceravos un excelpcional percorrido para orientarvos e non perder ningunha das claves do suxestivo diálogo entre arte e ciencia, entre tecnoloxía e creatividade que abre esta exposición.
O secretario xeral de Cultura da Xunta de Galicia, Anxo M. Lorenzo, presentou esta fin de semana na Feira Internacional de Arte Contemporáneo ARCO Madrid 2021 o catálogo da exposición do Museo Centro Gaiás Os brancos segredos do seu ventre, publicación á que lle deu categoría de “peza artística”.
A Xunta de Galicia sumouse hoxe á Federación Galega de Teatro Afeccionado (FEGATEA) na conmemoración dos seus 21 anos de andaina nunha xornada festiva no Gaiás. Das 10,00 horas ás 20,00 horas, a Cidade da Cultura convértese en escenario dun completo programa de actividades culturais con funcións de microteatro, clow, monicreques e pezas de animación, ademais de obradoiros de escrita e lecturas dramatizadas da man das compañías que forman parte de FEGATEA.
A Federación Galega de Teatro Amador (FEGATEA) conmemora 21 anos de andadura nunha xornada festiva no Gaiás, cun completo programa de actividades culturais con funcións de microteatro, clown, monicreques e pezas de animación, ademais de obradoiros de escrita e lecturas dramatizadas da man das compañías que forman parte de FEGATEA. Con esta xornada, que conta co apoio da Xunta de Galicia, a Federación quere compartir coas agrupacións teatrais que a conforman a celebración do Premio da Cultura Galega que recibiron este ano polo seu labor nas artes escénicas ao longo de dúas décadas.
A Xunta de Galicia amplía o vencello entre a Cidade da Cultura e o Camiño de Santiago coa instalación no Bosque de Galicia dunha intervención escultórica de Francisco Leiro, Zapatos no Camiño, que pode visitarse desde hoxe. A obra, composta de tres pezas realizadas en diferentes materiais, sitúase na cima da ladeira do Monte Gaiás que se abre sobre Compostela, establecendo un diálogo visual coa Catedral de Santiago e a Vía da Prata, que discorre paralela ao complexo na súa entrada á capital de Galicia.
