O conselleiro de Cultura, Lingua e Xuventude, José López Campos, asistiu ao acto de celebración dos 25 anos da Federación Galega de Teatro Afeccionado, que tivo lugar durante a xornada de hoxe na Cidade da Cultura e que contou cunha vintena de actuacións de formacións teatrais de toda Galicia.
O conselleiro de Cultura, Lingua e Xuventude, José López Campos, asistiu hoxe no Gaiás ao arranque do VIII Festival de Bandas Infantís e Xuvenís de Galicia, un certame no que participan preto de 600 intérpretes das seccións máis novas dunha ducia de bandas de música populares das catro provincias galegas, organizado pola Federación Galega de Bandas de Música co apoio da Xunta.
O director xeral de Cultura, Anxo M. Lorenzo, deu a coñecer esta mañá a convocatoria dunha nova residencia artística impulsada pola Xunta de Galicia e a Universidade de Santiago de Compostela para promover proxectos artísticos vinculados coa investigación científica. Trátase da Residencia ArtLab IGFAE , que promoverá que un artista ou colectivo se integre na vida cotiá da Cidade da Cultura, así como do Instituto Galego de Física de Altas Enerxías, centro de investigación mixto da USC e a Xunta.
A Federación Galega de Teatro Amador (FEGATEA) conmemora 25 anos de andadura nunha xornada festiva no Gaiás cun completo programa con case 20 actuacións de formacións de toda Galicia.
A Federación Galega de Teatro Afeccionado comezou no ano 2000 a súa andadura cara ao fornecemento do tecido cultural ao redor do teatro amador no ámbito autonómico a través de actividades formativas, de intercambio, mostras e festivais de teatro.
A Cidade da Cultura e o Instituto Galego de Física de Altas Enerxías (IGFAE), centro de investigación mixto da USC e a Xunta de Galicia, poñen en marcha as Residencias ArtLab IGFAE, unha nova iniciativa para promover proxectos artísticos vinculados coa investigación científica no campo da física.
O Camiño Portugués. Lembranzas de mar e pedra é un proxecto expositivo e editorial que retrata as realidades e paisaxes que conforman o itinerario do Camiño Portugués e tece un diálogo entre a fotografía do pasado e as olladas do presente. De Porto a Santiago de Compostela, as paisaxes, a vida nas prazas das aldeas, os monumentos e as escenas cotiás que foron inmortalizadas en séculos pasados volven ser motivo de inspiración baixo unha nova ollada.
O conselleiro de Cultura, Lingua e Xuventude, José López Campos, inaugurou hoxe no Multiusos Mercado Sabarís de Baiona a exposición O Camiño Portugués. Memoria de mar e pedra, que reúne 65 imaxes dunha trintena de fotógrafos galegos e portugueses dos séculos XIX, XX e XXI. As instantáneas retratan a evolución histórica das realidades, das paisaxes e do patrimonio do itinerario xacobeo que transita entre a cidade do Porto e Santiago de Compostela e exhibiranse en Sabarís ata o vindeiro 29 de xullo.
O director xeral de Cultura, Anxo M. Lorenzo, acompañado pola directora-xerente da Fundación Cidade da Cultura, Ana Isabel Vázquez, deulle hoxe a benvida ás persoas participantes na V Residencia literaria da Cidade da Cultura. Desde hoxe, e ata o 12 de xullo, un total de dez escritoras e escritores emerxentes en lingua galega compartirán un espazo de traballo no Gaiás no que poñer en común inquedanzas e coñecementos para mellorar os seus proxectos inéditos de poesía, teatro, novela e contos.
O próximo xoves 3 de xullo, ás 21 horas, darán comezo os concertos de Atardecer no Gaiás coa actuación de The Rapants, unha das bandas galegas con máis proxección dos últimos anos. Os de Muros traerán á Cidade da Cultura o pop surfeiro e alegre do seu último disco, La máquina del buen rollo, galardoado co premio ao mellor álbum en galego nos Premios MIN da música independente estatal.
O conselleiro de Cultura, Lingua e Xuventude, José López Campos, inaugurou esta mañá no Museo Centro Gaiás da Cidade da Cultura a instalación de arte dixital Castelao. Mirar por Galicia, a experiencia tecnolóxico-cultural máis ambiciosa desenvolvida ata o momento sobre a figura do ilustre autor, artista, político e intelectual Alfonso Daniel Rodríguez Castelao.
