A Cidade da Cultura e o Instituto Galego de Física de Altas Enerxías (IGFAE), centro de investigación mixto da USC e a Xunta de Galicia, poñen en marcha as Residencias ArtLab IGFAE, unha nova iniciativa para promover proxectos artísticos vinculados coa investigación científica no campo da física. Estas residencias diríxense a persoas ou colectivos que desenvolvan o seu traballo en todo tipo de disciplinas artísticas, con propostas que abran novas perspectivas no campo da arte, da ciencia, da tecnoloxía e da sociedade, ben a través dunha obra totalmente nova ou da ampliación de obra en curso.
O/a artista residente terá un espazo de traballo no IGFAE e posteriormente nos espazos REGA da Cidade da Cultura para realizar a súa propostas. Durante todo este tempo beneficiarase, ademais, de asesoramento científico e artístico mediante a colaboración co persoal do IFGAE e do Gaiás. Isto permitiralle descubrir proxectos de investigación científica, os seus obxectivos, os métodos empregados e enfoques experimentais ao tempo de pór en diálogo estas experiencias e procesos coa mentoría artística.
A proposta elixida recibirá, ademais, unha achega de 8.000 euros e aloxamento nunha residencia universitaria para o seu desenvolvemento. A resolución da convocatoria anunciarase o 3 de decembro de 2025 e o período de residencia será entre o 1 de febreiro e o 30 de abril de 2026. A obra resultante darase a coñecer ao público nunha exposición na Cidade da Cultura no último trimestre de 2026.
Prazos e candidaturas
A convocatoria diríxese a artistas (maiores de 18 anos) ou colectivos artísticos relacionados co contexto artístico contemporáneo galego e o prazo de candidaturas está aberto ata o 20 de outubro de 2025.
Cada solicitude deberá achegar o formulario de inscrición cuberto e asinado, ademais da seguinte documentación, que deberá enviar por correo electrónico ao enderezo que figura nas bases da convocatoria:
- Descrición do traballo artístico que se vai realizar (máximo 300 palabras).
- Breve descrición das expectativas con respecto á colaboración coa comunidade científica, así como os recursos necesarios (máximo 600 palabras).
- Plan de produción do proxecto, cronograma e estimación de custos desagregados por partidas.
- Dossier artístico que inclúa proxectos e obras anteriores cunha breve biografía.
Beneficios da residencia
- Un espazo de traballo no IGFAE durante un máximo de 6 semanas e un mínimo de 3 semanas.
- Un espazo de traballo na Cidade da Cultura durante un máximo de 6 semanas e un mínimo dunha semana.
- Mentoría científica e asesoramento artístico e curatorial durante o desenvolvemento do proxecto.
- Aloxamento nunha residencia universitaria durante os meses da residencia e nas datas que se puidesen precisar para participar en actos e actividades derivados da mesma.
- Difusión do proxecto en publicacións e redes do IGFAE e Cidade da Cultura.
- Unha bolsa de 8.000 euros na que se inclúen honorarios, gastos de produción, viaxes e manutención.
