The Rapants case non necesitan presentación. A banda, formada en Muros en 2018, leva animando desde entón festas e festivais por toda a Península Ibérica. Co seu último álbum La máquina del buen rollo (Premio MIN ao Mellor álbum en galego), e un son que surfea entre o pop, o garage e o disco, veñen a contaxiar a súa enerxía "rapante" e a facernos saltar ata gastar as zapatillas no primeiro concerto de Atardecer no Gaiás.

Eris MacKenzie é o nome do proxecto en solitario de Carlos Eirís. Unha combinación de electrónica minimalista con música tradicional galega a través da que fala das experiencias felices ou non tanto que o marcaron (relacións afectivas, problemas familiares, autoesixencia excesiva...). O coruñés vén de sacar Meu Ceu: Cantigas industriais e brutalismo emocional (AAldea, 2025) un álbum de 14 temas concibido como un proceso de duelo e liberación.

Ana Lua Caiano explora a fusión do folclore portugués coa electrónica, incorporando os sons do cotián e da tradición en melodías superpostas e letras poéticas que conectan fondamente co público. O seu nome emerxeu na escena portuguesa hai pouco máis dun ano e co lanzamento do seu disco debut Vou Ficar Neste Quadrado (Glitterbeat, 2024) logrou consquistar á crítica especializada internacional e a festivais como o Primavera Sound. 

Calle Mambo veñen de Chile para presentar o seu terceiro disco, Retumba la Tierra, que editaron a comezos deste mes de xuño. O seu son busca unificar o folclore latinoamericano cos beats electrónicos e os ritmos urbanos, mostrando a riqueza das músicas do continente. Ata dez instrumentos tradicionais (quena, quenacho, charango, ronroco…) para invocar o baile e facer viaxar ao público pola diversidade de ritmos do outro lado do Atlántico. 

DIRTY SUC
Dirty Suc é un rapeiro vigués que leva os últimos catro anos sen parar de sacar música de maneira profesional, e toda a vida escribindo letras e compoñendo cancións. A súa carreira medrou de maneira exponencial ata ter máis de 130.000 ouvintes mensuais en Spotify, unha lexión de fans, seis mixtapes con colaboración con referentes como C. Tangana ou Hard GZ e dous álbums, o último titulado Fillo do Mar II.

FAENNA
Desde o barrio malagueño de Huelin, Faenna eríxese testemuño da evolución da cultura andaluza. Un estilo afiado que destaca polas súas letras e enxeño, que no seu primeiro EP, Espabilá, mesturaba a esencia do rap clásico de Nova York con samplers de soul e jazz. Agora volve a escena con Julia y Manuel, un traballo que demostra a súa madurez como artista e como muller que ama, odia, ri, sofre, presume e pelexa, disposta e enfrontar calquera desafío.

AL SAFIR
Al Safir está consolidado como un dos grandes dentro do rap underground en español. Cun estilo que combina líricas crúas e mensaxes profundas, despegou en 2020 con Blow Up, un videoclip gravado con apenas 1.400€. Agora, este representante do rap bastardo da Serra de Madrid leva catro álbums de estudio, máis de medio millón de ouvintes mensuais en plataformas e encheu o Palacio Vistalegre para presentar ou seu último traballo Black Ops.

Viguesa con raíces brasileiras, Lua de Santana mestura pop, música club e soul en cancións nas que explora a súa identidade e os ritmos afrolatinos para estimular o baile. Inspirada por artistas como SZA, Nina Simone, Beyoncé e FKA Twigs, Lua comezou en 2024 unha carreira ascendente grazas ao éxito do single PiRi PiRi e o seu EP Ginga, que a deron a coñecer ao público e lle abriron as portas a colaboracións con artistas como Nathy Peluso.

Con elementos que van dende o pop alternativo, o indie electrónico, o neo-jazz, o fado ou a música tradicional galega, Mocho Gris debutan con 2, un disco no que o galego Lucas de Centi (líder de Néboa e Mel, e colaborador de Baiuca e Aliboria) e o portugués João Neves (recoñecido artista luso e tamén colaborador de Baiuca) expanden os límites do pop ibérico, explorando as fendas entre diversos xéneros e trenzando un espazo sonoro propio.

La Toñi, artista viguesa coñecida por ser a voz e líder do grupo pop Dalsi, transfórmase en solitario cunha proposta entre o europop e o synthpunk na que a tristura se baila. Temas que falan de amor, de resacas emocionais e que celebran a amizade forman o seu primeiro EP, M D Amor <3, editado en cassete en 2024, no que atopamos influencias de artistas como Crystal Castles, HEARTSREVOLUTION, Strawberry Switchblade ou CSS.

Desde Berlín chegan á Praza central do Gaiás Melodiam, un dúo formado polas pontevedresas Almudena e Carlota. A súa é unha proposta electrónica e urbana con letras vitalistas que coida ao detalle a dirección de arte, a producción e a composición dos seus temas para construír un imaxinario persoal que toma inspiración de melodías globais. Bótalle un ollo a calquera dos seus vídeos, como Baby Girl ou o seu último single SERÁ M3JOR.

Como xa é tradición, o escenario de Atardecer no Gaiás acollerá as propostas gañadoras na modalidade de música do certame Xuventude Crea 2024, co que a Xunta de Galicia premia o talento creativo máis novo. O R&B da canguesa Sara Gimeno (1º premio), a fusión de jazz e indietrónica de Lontras (2º premio) e o trío de música contempránea Slimak actuarán na praza central.

XOV 21 AGOSTO | FUTURACHICAPOP + KIKE VARELA DJ

Sintetizadores e melodrama son as marcas da casa de Futurachicapop, unha das voces máis orixinais do pop actual. Himnos contaxiosos e confesionais nos que o amor, o desexo e a nostalxia son material para o baile e a autoafirmación queer. Literatura Romanticofestiva é o título do seu último traballo, unha reinterpretación e homenaxe ao pop chicle dos 2000s que xoga co eufórico e o melancólico para demostrar que o romanticismo segue vivo.

Kike Varela é un dos DJs de música electrónica con máis sona de Galicia. Muiñeira de Chantada foi unha das dez cancións en galego que máis soou en Youtube en 2023, e escoitouse tamén en pistas de baile, festivais, programas de tv e incluso no estadio do Depor. Gañar o concurso de DJs do Nova Era Beach abriulle a posibilidade de pinchar nun dos festivais máis grandes de Europa xunto a artistas como Timmy Trumpet ou Steve Aoki. Con el pecharemos esta edición de Atardecer no Gaiás.