A Cidade da Cultura foi a insignia da cultura galega en 2023, segundo vén de publicar o Observatorio da Cultura da Fundación Contemporánea, un prestixioso informe elaborado coas valoracións de 414 expertos e profesionais de toda España que mantén a Galicia como a sexta comunidade pola calidade e innovación da súa oferta. Así, o Gaiás encabeza a listaxe de propostas culturais en Galicia e entra no número 63 do ránking nacional, no que tamén figura o Centro Galego de Arte Contemporánea (CGAC) no 84, 13 postos por riba de 2022.

O director xeral de Cultura, Anxo M. Lorenzo; a directora xerente da Cidade da Cultura de Galicia, Ana Isabel Vázquez, e a directora de Escenas do cambio, Kirenia Martínez, mantiveron hoxe unha reunión para pór sobre a mesa o traballo avanzado de cara á organización da décima edición do Festival de teatro, danza e arte en acción da Cidade da Cultura, en maio de 2024.

A Cidade da Cultura acolle neste primeiro mes do ano unha selección do mellor cine para público miúdo cunha nova edición de Pequefilmes, o festival internacional de curtametraxes infantís que proxectará no Gaiás máis de medio cento de obras procedentes de 16 países, o 26, 27 e 28 de xaneiro.

A exposición Luz na Terra. O Seminario de Estudos Galegos: unha institución de alta cultura despídese este domingo 7 de xaneiro do Museo Centro Gaiás, onde fora inaugurada a comezos do pasado mes de xullo. A mostra encadrouse nos actos cos que neste ano que vén de rematar se conmemorou o centenario da fundación do Seminario.

A Cidade da Cultura de Galicia pechará o 2023 organizando máis de 700 eventos e actividades culturais. Con estas cifras despide un ano no que arrincou a construción do Centro galego de artes dixitais, e no que o Gaiás volveu situarse entre as tres institucións da Comunidade mellor valoradas polo Observatorio da Cultura da Fundación Contemporánea.

O director xeral de Cultura, Anxo M. Lorenzo, prendeu este venres a iluminación da grande árbore instalada no Museo Centro Gaiás dando así comezo á programación de Nadal na Cidade da Cultura. O Hall de Tirantes transfórmase nesta época nun mundo de fantasía onde o importante é crear un espazo para fuxir das présas destas datas, convidando a unha celebración máis sostible e sosegada, volvendo ás orixes: gozar en familia e compartir tempo e xogos.

A Xunta de Galicia vén de ratificar un acordo coa Fundación Calouste Gulbenkian de Lisboa e a Custodia de Terra Santa de Xerusalén para exhibir na Cidade da Cultura —entre marzo e agosto de 2024— o extraordinario e pouco coñecido tesouro artístico do Terra Sancta Museum. Santiago de Compostela será o único punto en España onde se poderá ver este conxunto de obras que agora mesmo se exhiben na capital portuguesa, onde veñen de iniciar un itinerario internacional que as achegará a diversas cidades de Europa e América.