O obxectivo fundamental deste curso é proporcionar unha visión global daqueles sectores de actividade organizada que teñen como obxecto principal a produción ou a reprodución, a promoción, a difusión e/ou a comercialización de bens, servizos e actividades de contido cultural, artístico ou patrimonial.
Como obxectivos específicos este programa pretende:
- Asesorar de forma individualizada a cada un dos participantes, tanto aos actuais como aos potenciais emprendedores en industrias culturais, sobre as oportunidades no seu respectivo sector de actividade como no desenvolvemento dun plan de negocio.
- Manexar os instrumentos empresariais necesarios para deseñar e dirixir proxectos culturais con obxectivos estratéxicos definidos.
- Desenvolver capacidades de prospectiva que permitan anticipar os cambios da nosa sociedade, facilitando a comunicación e proxección dos proxectos.
- Fomentar o desenvolvemento das novas tecnoloxías na produción cultural.
- Adquirir habilidades e ferramentas para definir obxectivos, enfrontarse a desafíos e atopar solucións aos retos aos que se enfronta o emprendedor.
- Coñecer as bases xurídicas e administrativas nos diferentes campos de actuación.
- Lograr a competencia para xestionar proxectos capaces de confluír con outros sectores económicos e xerar máis recursos.
- Fomentar a creación, consolidación e modernización das industrias culturais e creativas.
- Contribuír á mellora da formación dos traballadores e emprendedores do ámbito cultural e creativo.
- Apoiar ás novas xeracións de xestores culturais.
- Favorecer a internacionalización do sector.
- Fomentar o mecenado cultural.
Para crear unha empresa e/ou consolidar unha xa existente precísanse, ademais de determinadas capacidades, moitas horas de traballo e formación no terreo empresarial. Todo iso ha de ir acompañado dunha forte motivación, que resulta vital para conseguir o obxectivo e que provén, na maioría dos casos, dunha actitude emprendedora e activa. Os participantes no programa axustaranse aos seguintes perfís:
- Participantes menores de 30 anos que non se atopan empregados nin participan nos sistemas de educación ou formación, vinculados ao mundo cultural e con interese en coñecer a importancia das industrias culturais e creativas.
- Emprendedores/as que conten cunha idea de negocio e desexen realizar un proxecto viable de creación de empresa cultural para o seu posterior posta en marcha.
O programa de “Transformación dixital, xestión empresarial e emprendemento nas industrias culturais e creativas” está organizado pola Cámara de Comercio de Santiago, en colaboración coa Fundación Incyde e conta co cofinanciamento da Xunta de Galicia a través Fundación Cidade da Cultura de Galicia e do FSE.