O presidente da Xunta, Alberto Núñez Feijóo, renovou onte o compromiso co deporte galego e coa alta competición e anunciou unha partida de 500.000 euros para recoñecer os méritos dos deportistas galegos de alto nivel acadados nos anos 2015 e 2016. Durante a recepción aos campións galegos en competicións internacionais, Feijóo destacou o esforzo, o sacrificio e a entrega de todos eles, valores que, segundo aseverou, “convértenos nunha representación de todo o que os galegos somos e do que todos os galegos aspiramos a conseguir”.

Entradas esgotadas para a Holi Gaiás, a divertida carreira lúdica que terá lugar este sábado, 25 de marzo, na Cidade da Cultura.

Nun percorrido de 5 quilómetros polo complexo deseñado por Peter Eisenman, a Holi Gaiás permitirá descubrir e gozar da Cidade da Cultura nun ambiente festivo que lembrará o popular festival de primavera celebrado tradicionalmente na India, Guyana e Nepal, no que se festexa a chegada da nova estación cunha explosión de cores.

Unha intervención da artista Irma Álvarez-Laviada (Xixón,1978) inaugurada o xoves á tarde na Cidade da Cultura de Galicia fai visible a terceira Torre Hejduk a través dunha instalación lumínica. Neste proxecto, titulado A liña Hejduk, a creadora emprega liñas de led para debuxar o contorno do espazo baleiro entre as dúas torres construídas.

O Arquivo de Galicia pon en valor o labor pioneiro da deseñadora galega María Moreira a través da exposición Mulleres sobranceiras. A mostra documental, que se pode visitar desde hoxe na Cidade da Cultura, foi presentada esta mañá pola secretaria xeral da Igualdade, Susana López Abella, polo secretario xeral de Cultura, Anxo Lorenzo, e pola directora-xerente da Cidade da Cultura, Ana Isabel Vázquez Reboredo, co gallo do Día Internacional da Muller.

O presidente da Xunta, Alberto Núñez Feijóo, destacou este mediodía o valor histórico e cultural dos máis de 600 libros do fondo documental do Banco Gallego que, desde hoxe, estarán á disposición de todos os galegos no Arquivo de Galicia.

A Consellería de Cultura e Educación daralle a benvida á primavera o vindeiro 25 de marzo cunha xornada lúdica nos espazos verdes do Gaiás. Ao longo de todo o día, o Bosque de Galicia, o Xardín Literario e o Parque do Lago da Cidade da Cultura acollerán un amplo programa de actividades que inclúe música, obradoiros, roteiros e ata unha carreira lúdica na que gozar ao aire libre en familia.

A Cidade da Cultura de Galicia acaba de asinar un novo convenio de colaboración coa Asociación de Jóvenes Empresarios (AJE) da provincia da Coruña para impulsar o emprendemento no Gaiás. Actividades formativas, de asesoramento e que buscan favorecer o punto de encontro entre emprendedores e empresarios serán os tres eixes nos que AJE e a Cidade da Cultura traballarán ao longo deste 2017 no Centro de Emprendemento de Galicia (CEM).