A Cidade da Cultura de Galicia allerá do 29 de setembro ao 1 de outubro de 2016 o Spin2016. Baixo o lema Creando Cultura Emprendedora, o maior evento de emprendemento universitario de Iberoamérica reunirá a 2.000 emprendedores, estudantes, investigadores, empresarios, investidores e académicos de 20 países, e ofrecerá apoio directo a 150 proxectos e startups nadas da Universidade.
O programa, que dedicará especial atención ás industrias culturais e creativas, inclúe charlas, conferencias, marketplace, obradoiros e seminarios, coa participación de empresarios de referencia internacional e expertos do mundo dos negocios, a academia, a ciencia, a gastronomía... Ademais, no marco do Spin2016, a RedEmprendia lanzará unha nova edición de Model2Market, programa dirixido a emprendedores que aínda non deron o salto ao mercado, e cuxo obxectivo é fortalecer modelos de negocio nados da Universidade que destaquen polo seu elevado grao de innovación e potencial de impacto social e económico.
O evento Spin2016 medra e consolídase con cada nova entrega. Nas súas dúas edicións previas tivo 1.300 asistentes de 16 países, máis de 70 entidades colaboradoras públicas e privadas, e repartiu máis de 160.000 euros en premios para impulsar ideas, modelos de negocio e proxectos emprendedores.
O Spin2016 está organizado por RedEmprendia co apoio das consellerías de Educación e de Industria da Xunta de Galicia, a Universidade de Santiago de Compostela, a Universidade de Vigo, a Universidade da Coruña, a Universidade do Porto, a Fundación Cidade da Cultura de Galicia e Banco Santander, a través de Santander Universidades.