A Xunta de Galicia organiza unha xornada profesional dirixida a profesorado universitario, persoal investigador e especialistas en historia e patrimonio para dar a coñecer o proxecto de Galiverso. O vello Portomarín, que reconstrúe, grazas ás tecnoloxías dixitais, un anaco da antiga vila luguesa, tal como era antes de ser anegada pola construción do encoro de Belesar en 1963.
A presentación terá lugar o luns 20 de novembro no Hall de Tirantes do Museo Centro Gaiás ás 11:30 horas, coa participación do equipo de expertos galegos en patrimonio, arte dixital, historia e programación que recuperaron a memoria do vello Portomarín para que calquera persoa poida coñecelo a través das lentes de realidade virtual.
Os profesores de historia da arte da USC e membros do Centro de Investigación Interuniversitario das Paisaxes Atlánticas Culturais (CISPAC), Jesús Ángel Sánchez García e Julio Vázquez Castro; os especialistas do Centro Infográfico Avanzado de Galicia, Carlos Paz de Lorenzo e Anxo Miján Maroño, e Carlos Seijo, director do estudo Maxina, forman parte do persoal implicado neste proxecto.
A reconstrución do vello Portomarían dentro do Galiverso partiu dun amplo e rigoroso traballo documental a partir das gravacións da época conservadas na Filmoteca de Galicia, planos e cartografías antigas, e as máis de 40.000 fotografías que atesoura José López, de Foto Pereira Portomarín.
