A Federación Coral Galega organiza o I Certame Coral Galego os días 31 de outubro e 1 de novembro no auditorio do Edificio Fontán da Cidade da Cultura. O evento ten como obxectivo principal crear un punto de encontro e recoñecemento para as agrupacións corais de Galicia, tanto aquelas formadas por persoas adultas como as infantís e xuvenís, co fin de incentivar tamén o futuro do canto coral.
Contarase coa participación de 15 coros que representan a diversidade e a riqueza cultural galega. O certame estará dotado con preto de 10.000 € en premios e será avaliado por un xurado de recoñecido prestixio.
As sesións serán o venres, 31 de outubro de 2025 (a partir das 19:00 horas) para as corais infantís e xuvenís, e o sábado, 1 de novembro de 2025 (a partir das 17:00 horas) para as corais de persoas adultas. Máis información na web de FECOGA.
