O Consorcio Aeronáutico Galego (CAG) organiza o III Congreso Internacional Aeronáutico e Espacial de Galicia (CIAG), que terá lugar o xoves 27 de xuño na Cidade da Cultura. O evento ten a finalidade de achegar coñecemento sobre o futuro esperado do sector, as oportunidades que ofrece o soporte a aeronaves en servizo, ou os proxectos que se están levando a cabo no ámbito das Civil UAV' s, naves non tripuladas.
Así, o congreso contará coa participación de entidades como a Xunta de Galicia ou a Axencia Galega de Innovación, así como do ámbito universitario, tanto galego, coa presenza da Universidade da Coruña, como internacional, coa Universidade Autónoma Aeronáutica de Querétaro (México).
Ademais, estarán presentes representantes de empresas TIER 1 (que realizan un papel importante en cadeas de subministración complexas) da industria aeronáutica, como Indra Babcock Internacional e S4A Solutions For Aviation. Tamén outras entidades análogas ao Consorcio acudirán á devandita cita, como é o Aerocluster de Querétaro (México) e a Empresa Nacional de Aeronáutica de Chile.
Entre outros, o III CIAG contará coa asistencia do fabricante mundial e de Equipos Orixinais (OEM, polas súas siglas en inglés) Boeing.
