Con motivo do Día Mundial da Terra, Viaqua entregará ás 13:00h na Cidade da Cultura os premios da sétima edición do Certame Literario “Relatos de auga intelixente” destinado a escolares entre 12 e 17 anos de toda Galicia.
Esta nova edición estivo centrada no impacto que teñen os produtos non degradables no medio e nas redes de saneamento, como toalliñas, bastonciños, compresas, tampóns, máscaras, etc. ao desbotalos incorrectamente polo retrete en lugar de no lixo. A finalidade principal do certame é concienciar sobre os problemas sociais, económicos e ambientais derivados dun mal uso do sistema de saneamento, así como as medidas que se poden empregar nas cidades e núcleos de poboación de menor tamaño, e no noso día a día, para conseguir vivir nun mundo máis sostible.
No evento participarán, ademais do alumnado premiado, a xerente de Viaqua en Santiago, Ana Tejeiro; representantes do xurado do Certame; Susana González, técnica de Augas de Galicia; e Teresa Abalde, xurídica da empresa Viaqua; así como representantes dos dous centros santiagueses premiados, Carlos Encisa como director do IES Antón Fraguas e Teresa Iglesias, profesora do Colexio La Salle.
