Os poemas de Xela Arias vesten a música de Clara Pino e Pablo Vidal este xoves día 2 de decembro na Cidade da Cultura. O dúo presenta en concerto o seu último CD, Xela, traballo que compila as cancións que ambos compuxeron para as distintas homenaxes á poeta nas que participaron ao longo de 2021.
O concerto de presentación será no Auditorio Neira Vilas da Biblioteca de Galicia ás 20:30 horas, con entrada de balde ata completar as prazas.
Para Clara Pino, que coñeceu a Xela Arias nos seus anos de universidade, onde teceron unha grande amizade, a dedicatoria das Letras Galegas 2021 foi "a coartada perfecta para musicalizar os seus poemas". A iniciativa foi tan gratificante que decidiron gravar un EP cos novos temas compostos.
Xela é o segundo traballo conxunto de Clara Pino (arpa celta, voz) e Pablo Vidal, multi-instrumentista, compositor e productor.
