Código Cero organiza o luns 12 de marzo o seu Foro Tecnolóxico "25 anos da Rede en Galicia", que se celebrará no Auditorio 2 do CINC, dando comezo ás 19:30 horas.

Este Foro rememora cando en febreiro de 1993 o Centro de Supercomputación de Galicia (CESGA) se conectou por vez primeira coa rede de redes, Internet. Abría así na comunidade galega a porta de acceso a un novo mundo de intercambio de información, se ben naquel momento limitado a uns poucos ordenadores nas universidades e entidades públicas. Estas entidades poderían conectarse masivamente desde o posterior despregue da Rede de Ciencia e Tecnoloxía de Galicia para darlles servizo desde 1995.

Participan neste foro o catedrático da USC e director do CESGA en 1993, Juan Casares-Long; o subdirector técnico do CESGA e técnico de RECETGA, primeira rede de comunicacións de Galicia, en 1993, José Ignacio López Cabido; o responsable de comunicación do CESGA en 1993, Juan Luis Ruiz Buján; o profesor emérito de Física Teórica e ex reitor da USC, Carlos Pajares; e o autor de "Historia da Informática. Unha cronoloxía", Henrique Neira.