O Arquivo de Galicia celebra este xoves 9 de xuño o Día dos Arquivos. A partir das 13:00 horas, a Cidade da Cultura acollerá o acto de presentación pública do depósito do arquivo da Real Sociedade Económica de Amigos do País (RSEAP) de Santiago no Arquivo de Galicia, un fondo documental relevante para a investigación histórica e de gran valor patrimonial.
Ademais, o Arquivo de Galicia exhibe durante esta semana unha mostra cunha selección de documentos deste fondo, que inclúe os primeiros estatutos da RSEAP, o primeiro libro de contas, actas, memorias, estudos e informes sobre avances en diferentes ámbitos etc., que se pode ver na Aula 1 do edificio da Biblioteca e Arquivo de Galicia, na Cidade da Cultura.
Ese mesmo día, o Arquivo de Galicia tamén promove unha xornada de portas abertas de 9 a 14 horas e visitas guiadas, previa inscrición.
