Nesta nova sesión do ciclo Na Biblioteca de Galicia lese poesía acompañaranos o dúo artístico Aldaolado, composto por Lucía Aldao e María Lado, dúas poetas galegas de consolidada carreira, que no ano 2005 decidiron unir os seus nomes e os seus esforzos creativos para dar lugar a esta proposta.

Aldaolado é un proxecto artístico orientado á poesía escénica, co que conseguiron facer do recital un acto atractivo, próximo e divertido para todo tipo de público, mesmo para aquel que nunca leu poesía. A súa espontaneidade e complicidade en directo é a base sobre a que crearon case unha ducia de espectáculos. Con eles actuaron en centos de escenarios do máis variado, tanto en Galicia como máis aló das nosas fronteiras. Nos seus espectáculos María e Lucía tratan temas de interese colectivo a través do humor, coma a lingua, o amor romántico, a igualdade de xénero, a vida de poeta e un longo etcétera.

Para este recital, Aldaolado quere unirse á celebración dos 10 anos de existencia da Biblioteca de Galicia facendo unha retrospectiva dos seus espectáculos poéticos da última década. Será un recital de nostalxia e revisión e segundio adiantan: "de agradecer e maldicir, a partes case iguais, o paso do tempo".