O Centro PEN de Galicia celebra na Cidade da Cultura a entrega dos XII Premios Rosalía de Castro, nun acto literario que terá lugar o 29 de novembro ás 20:30 horas na Sala Eisenman, e que será presentado polo escritor Xosé Ramón Pena.
Estes galardóns, de carácter bianual, están pensado para premiar a traxectoria literaria de catro autores en lingua castelá, catalá, vasca e portuguesa, sistemas literarios veciños ao galego.
Nesta edición o Centro Pen Galicia decidiu outorgar os premios a Carmen Boullosa (México), Nuno Júdice (Portugal), Sergi Belbel (Cataluña) e Harkaitz Cano (Euskadi).
Estes catro escritores súmanse aos corenta e catro distinguidos nas edicións anteriores do premio, constituíndose nos "mellores embaixadores da literatura galega", segundo o xurado, formado por Luís González Tosar, Ánxela Gracián, Xabier Castro Martínez, Bieito Iglesias, Xosé Ramón Pena, Marilar Aleixandre, Luís Menéndez e Manuel Guede.
