A Axencia Galega das Industrias Culturais da Xunta de Galicia e a Asociación Galega de Profesionais da Xestión Cultural promoven a xornada “DIÁLOGOS DE DANZA. Unha ponte entre a creación e a programación”, o 28 de marzo na sala Eisenman da Cidade da Cultura.
Dirixido a compañías de danza, programadores do sector cultural, público e privado, técnicos de cultura, e profesionais da danza e as artes do movemento, o obxectivo principal será poñer en común os diagnósticos e propostas do colectivo das compañías de danza e artes do movemento e dos profesionais das artes escénicas en Galicia, para deseñar fórmulas que propicien a mellora dos índices de exhibición de espectáculos, o aumento de públicos e a sustentabilidade do sector da danza.
O programa inclúe a presentación de propostas de mellora no ámbito, unha sesión de pitching e a posta en común de experiencias e modelos inspiradores que están a ser innovadores. Esta xornada está dirixida polo xestor cultural Manu Lago e a coreógrafa, bailarina e investigadora Paula Quintas. Procurarase afondar no diálogo e coñecemento dos intereses e inquietudes dos diferentes perfíles —profesionais e artísticos—, e das entidades que habitan o sector da danza.
As prazas son limitadas, a inscrición está aberta neste formulario. Máis información do evento e inscricións na súa páxina web.
PROGRAMA
- 9.30h Apertura institucional
- 10.00h - 10.40h Punto de partida: presentación dos resultados sobre o proceso de análise e propostas para a mellora das programacións de espectáculos de danza e artes do movemento.
- 10.45h-10.55h Panorámica da escena galega da Danza en Galicia.
- 11.00h – 11.45h Danza en Galicia: Sesión de pitching a cargo de compañías de danza e/ou distribuidoras galegas.
- 11.45h - 12.10h PAUSA – CAFÉ
- 12.10h - 13.15h Presentación de experiencias inspiradoras sobre danza.
- 13.20h - 14.15h Conversa: Cara novos modelos de exhibición da danza nos concellos de Galicia.
- 14.30h - 16.00h Pausa – Xantar
- 16.00h – 17.30h Compañías e programadores: un traballo conxunto para o desenvolvemento da danza. Dinámica participativa con Diego Parajó (XENEME).
- 17.30h - 18.00h Peche e conclusións.
