O proxecto Conserval Poctep celebra a súa conferencia final o 15 de marzo na Cidade da Cultura. Os resultados deste proxecto transfronteirizo, centrado na valorización de produtos e augas residuais da industria conserveira en España e Portugal daranse a coñecer nun evento aberto a público —previo rexistro— no Edificio CINC do Gaiás. As presentacións e ponencias poderán seguirse tamén en remoto.
A conferencia final guiaranos polos principais fitos alcanzados polo consorcio, froito dun traballo de investigación multidisciplinar grazas ao que se desenvolveron e probaron solucións e tecnoloxías innovadoras que permiten o aproveitamento das correntes residuais —sólidas e líquidas— da industria das conservas.
O evento divídese en catro bloques. Durante o primeiro, ‘Recuperación de produtos de valor presentes en correntes da industria alimentaria’, analizaranse os resultados do proxecto respondendo á pregunta: que é o que conseguimos? desde abril de 2019 ata a actualidade. Nesta primeira sección participará o líder do proxecto, Cetaqua, xunto con ANFACO-CECOPESCA e a Universidade de Santiago de Compostela (USC).
No seguinte apartado do evento, tamén da man de Cetaqua, achegarémonos ao proxecto CIGAT Biofactoría, para descubrir as sinerxías compartidas cos sectores lácteo e vitivinícola. Aquí debateranse tamén os desafíos atopados para industrializar a produción de ácidos graxos volátiles a partir de correntes residuais.
Os bloques restantes abordarán as oportunidades de transferencia ao mercado das tecnoloxías resultantes, así como a percepción e aceptación das persoas usuarias finais dos novos produtos desenvolvidos, con presentacións impartidas por FEUGA e a USC, respectivamente. A xornada concluirá cun debate sobre a implantación da economía circular na industria alimentaria.
