A Sociedade para o Desenvolvemento de Proxectos Estratéxicos de Galicia nace para madurar iniciativas empresariais con relevante efecto dinamizador na economía galega. Favorecerá a transformación da economía implantando un modelo verde e dixital. Promoverá a captación de fondos, a incorporación de socios e a colaboración entre institucións, ao tempo que fomentará especialmente a participación das pemes. O seu primeiro obxectivo é apoiar a maduración das propostas incluídas na candidatura galega aos fondos europeos Next Generation e axudar despois na busca de futuros investidores para o seu desenvolvemento. Prestará tamén diferentes servizos de asesoramento para garantir a presentación e a posta en marcha das novas actividades empresariais, como apoio xurídico, económico, administrativo, comercial e industrial e de xestión e dirección. O capital inicial desta nova sociedade limitada de maioría privada ascende a 5M€, dos que a Xunta de Galicia achega o 40%, mentres que o 60% restante se reparte entre Abanca (38%), Reganosa (12%) e Sogama (10%).
