A conselleira de Emprego e Igualdade, María Jesús Lorenzana, fará entrega dos premios do deseño do cartel do 8 de marzo, Día Internacional da Muller, aos centros de ensino galardoados este ano. Na convocatoria do concurso de deseño do cartel do día 8 de marzo co gallo da celebración do Día Internacional da Muller participou alumnado de Educación Infantil, Primaria, Educación Secundaria Obrigatoria (ESO) e de Bacharelato e Formación Profesional cun total de 123 propostas de centros educativos de Galicia.
Entre os carteis propostos polo alumnado de Infantil e de 1º ata 4º de Primaria alzouse co 1º posto o CPI O Progreso de Catoira (Pontevedra) e, co segundo, o CEIP Benigno Quiroga Ballesteros de Lugo. Na categoría de 5º e 6º de Primaria e 1º e 2º de ESO o primeiro premio foi para o IES Carlos Casares de Vigo e o segundo para o CEIP de Casás de Lugo. A proposta do CPR Santo Tomás do Porriño (Pontevedra) recibiu o primeiro premio na 3º categoría dirixida a estudantes de 3º e 4º de ESO, Bacharelato e FP, mentres o IES Plurilingüe de Elviña da Coruña quedou no segundo lugar.
