A Cidade da Cultura de Galicia acolle o 17 de decembro a entrega do I Premio de Novela Camiño de Santiago, promovido pola Academia Xacobea coa colaboración da Consellería de Cultura e Turismo, a Secretaría Xeral de Política Lingüística, Naturgy e a Editorial Galaxia.O acto terá lugar ás 17 horas na Sala Eisenman.

Catro son as obras finalistas seleccionadas polo xurado nesta primeira edición do galardón: El juego de la Coca, Camiño de Paixón, Ego Sum e Ecúmene. O premio está dotado con 6.000 euros e a novela gañadora será publicada pola Editorial Galaxia, tanto en galego como en castelán, grazas á colaboración de Política Lingüística. Un total de 15 orixinais presentáronse ao I Premio de Novela Camiño de Santiago.

O xurado encargado de escoller as finalistas e a obra gañadora está composto polo presidente da Academia Xacobea, Xesús Palmou; o escritor Ulises Bértolo; a responsable de Relacións Institucionais e Comunicación de Naturgy en Galicia, Amalia Baltar; o catedrático de Historia da USC, Pegerto Saavedra; a escritora Rosalía Morlán, e o director xeral da Editorial Galaxia, Francisco Castro.