A DrupalCamp Spain é un evento internacional que reúne tanto a grandes especialistas do desenvolvemento web como a persoas que queren ampliar o seu coñecemento ou simplemente coñecer a ferramenta Drupal. A edición de 2025 terá lugar na Cidade da Cultura, os días 19 e 20 de setembro.
O programa inclúe charlas, obradoiros e eventos de networking para afondar nas posibilidades deste xestor de contidos dinámico e libre, empregado tanto por institucións públicas e grandes marcas como por persoas usuarias sen coñecementos de programación pero interesadas na xestión e administración de sitios web.
Ademais, o día 18 haberá un Business Day no Hotel Monumento San Francisco, en Santiago de Compostela, especialmente orientado a perfís de negocio e de xestión. Será un espazo para compartir experiencias, visións e formas de traballo entre profesionais do sector, no que tamén se celebrará a entrega dos Drupal Splash Awards aos 9 proxectos máis relevantes de España.
Podes consultar o programa completo na web do DrupalCamp.
