O Auditorio Neira Vilas da Cidade da Cultura acolle o venres 13 de decembro ás 19.00 horas a entrega do Premio Arume de Poesía para a Infancia 2024, do que resultou gañadora Beatriz Dourado coa obra Latexos. O galardón está convocado pola Fundación Neira Vilas xunto coa empresa Deleite e a asociación do libro infantil e xuvenil Gálix.
O xurado destacou no poemario «o intelixente e suxestivo uso de recursos diversos como as onomatopeias, anáforas ou metáforas que constrúen un universo poético engaiolante para o público novo». Salientou ademais a creatividade no uso e o dominio do rexistro musical e a inclusión de caligramas, trabalinguas, palíndromos e un variado acompañamento gráfico e icónico.
No acto tamén se presentará o libro Versos (a)variados, obra de Pablo Nogueira Campo, gañador da edición anterior e publicado pola editorial Embora.
