Dende o ano 2012 o IES Maruxa Mallo de Ordes caracterízase por promover a igualdade de xénero entre a comunidade educativa que integra o Centro e, ademais de promover unha educación transversal e integradora en todos os niveis, a Comisión de Igualdades do Centro organizou diferentes actos entre os que salienta o Congreso Escolar polas Igualdades, que este ano na súa V edición se celebra na Cidade da Cultura.
O encontro contará cunha inauguración institucional con representantes da Xunta de Galicia, o concello de Ordes e o centro de ensino e incluirá relatorios sobre diferentes cuestións relativas á igualdade e un feixe de actividades realizadas por alumnas e alumnos do centro. Durante o evento entregarase ademais o premio Maruxa Mallo e os agasallos ás persoas gañadoras do Concurso de Microrrelatos 25N.
O Congreso concíbese como un proxecto didáctico transformador que implique ao alumnado, e especialmente ás alumnas, na organización e desenvolvemento dun encontro do que son protagonistas, converténdoo nun proxecto que os leva a asumir responsabilidades e compromiso e nunha experiencia de gran contido pedagóxico en materia de integración, cooperación e igualdade.
