O Clúster da Madeira e o Deseño de Galicia, en colaboración co Instituto Galego de Promoción Económica e o patrocinio das empresas Madeiras Rubén, Molduras do Noroeste, Senssia e Grupo Siero, celebra as XII Xornadas de Arquitectura e Deseño que terán lugar o venres, 7 de xullo, a partir das 09:30 horas, no Auditorio Xosé Neira Vilas, da Cidade da Cultura.
O deseño é unha ferramenta fundamental no proceso de innovación, tanto na parte da propia definición do produto, como na súa comunicación e aceptación polo mercado. Da man de arquitectos, deseñadores, ebanistas e empresas do sector abordarase a importancia do deseño na construción e edición de produto, coa mirada posta no mercado e o consumidor final.
Os arquitectos Pablo Falcón e Ángel Santorio, e o ebanista e artesán Ángel Otero, compartirán cos asistentes as súas experiencias profesionais co emprego da madeira. Ao termo das exposicións, celebrarase unha mesa de debate á que se sumarán as empresas asociadas ao CMD, Cándido Hermida e Galopín Playgrounds para achegar a visión industrial. O debate, moderado pola arquitecta María Fernández, estará aberto a todos os asistentes.
