Visitas especiais ás exposicións 'Valor e mestría' e 'Pensar coas mans' | Día dos Museos 2019

Con motivo do Día Internacional dos Museos (DIM), que este ano se celebra baixo o lema Os Museos como eixos culturais: o futuro da tradición, a Cidade da Cultura programa visitas comentadas especiais ás dúas exposicións que actualmente acolle o Museo Centro Gaiás e que enxalzan a nosa tradición como alicerce cultural e como valor de futuro da vangarda artística.

Visita comentada especial á exposición Valor e mestría. Galicia como fútbol, a mostra máis ambiciosa sobre o fenómeno do fútbol na nosa comunidade, tanto en percorrido histórico como en número de pezas: 300, das cales 200 son orixinais.

  • 11.30-12.30h. Visita comentada especial, guiada polo comisario da mostra, Rubén Ventureira
  • 18.30-19.30h. Visita comentada especial, guiada polo departamento de Educación, Mediación, Información e Asistencia ao Público do Museo Centro Gaiás

Visita comentada especial á exposición Pensar coas mans. Cestería, cerámica e xoiería de Galicia. Un percorrido pola artesanía galega desde a Idade de Ferro á actualidade, que supón recoñecer nas novas xeracións a tradición, técnicas e materiais herdados dos nosos ancestros, que ademais de seren sinal de identidade diferenciador converten as creacións dos artesáns e artesás galegas actuais en tendencia no deseño e na moda contemporánea.

  • 12.30-13.30h. Visita comentada especial, guiada pola comisaria da mostra, Verónica Santos.
  • 17.30-18.30h. Visita comentada especial, guiada polo departamento de Educación, Mediación, Información e Asistencia ao Público do Museo Centro Gaiás