O Colexio Profesional de Enxeñaría Técnica en Informática de Galicia (CPETIG), coa colaboración da Amtega, organiza a VII Xornada de Informática Xudicial que terá lugar o 4 de outubro na Cidade da Cultura, coa dirección técnica de Víctor Salgado.
A edición deste ano, convocada baixo o título Ciberseguridade, privacidade e intelixencia artificial, adopta o nome propio de #IURISTICGAL17, co que a organización quere singularizar este evento, xa moi consolidado no ámbito estatal, e situar a Galicia no liderado do debate sobre a necesaria complementariedade entre a informática e a xustiza.
Intervirán como relatores Alejandro Sánchez del Campo Redonet, regulatory counsel en Telefónica Digital; Ofelia Tejerina, avogada da Asociación de Internautas e membro do Grupo de Traballo sobre Dereitos Dixitais dos Cidadáns; Pilar Vila, perita informática en Forensic &Security; Juan Antonio Frago Amada, fiscal do Grupo de Delitos Económicos en A Coruña; Silvia Barrera, inspectora da Unidade de Investigación Tecnolóxica da Policía Nacional; e Eloy Velasco, maxistrado da Sala de Apelación da Audiencia Nacional.
O obxectivo de #IURISTICGAL17 é visibilizar as vantaxes da incorporación e uso das novas tecnoloxías no proceso xudicial, dotar de maior seguridade xurídica á nova realidade tecnolóxica e incrementar a efectividade e a eficiencia da administración xudicial co uso das novas ferramentas electrónicas e forenses avanzadas.
Máis información e inscricións en http://iuristicgal.cpetig.org
