A Cidade da Cultura de Galicia acolle os días 21 e 22 de setembro o VII Torneo Internacional de Bridge da AGB (Open de Galicia). Unha cita que conta cun importante prestixio e moi boa acollida entre os xogadores de bridge tanto de Galicia como foráneos.

Ata 90 parellas de xogadores demostrarán a súa habilidade ao longo de dúas xornadas e repartiranse máis de 4.500 euros en premios para as parellas mellor clasificadas por categorías. A participación no torneo será exclusiva para xogadores con licenza federativa actualizada, tanto nacionais como estranxeiros.

Haberá servizo gratuíto de autobús desde a Praza do Obradoiro á Cidade da Cultura para todas as persoas inscritas, con saída 45 minutos antes da hora de comezo da competición e volta ao rematar cada xornada do torneo.

As inscricións inclúen canon federativo, dereitos de arbitraxe e cea. Están abertas ata o 19 de setembro ás 22 horas.

Máis información na web da Asociación Galega de Bridge (AGB).