A masterclass 'As Añas en Pontevedra', de percusión e voz, estará conducida por María Xosé Martínez Pérez. A súa traxectoria no mundo do folclore galego iníciase na Asociación Folclórica Xalgarete en Vigo e como mestra de pandeireta, baile e canto tradicional en diversas institucións da provincia de Pontevedra dende o ano 1981. É entón cando comeza a recuperar e divulgar a cultura popular galega, participando tamén en diversos coloquios e certames folclóricos dentro e fóra de Galicia. Actualmente coordina o programa 'Enredando, artesanía na escola', en colaboración coa Fundación Pública Artesanía de Galicia e con AGAT. Así mesmo, leva a cabo obradoiros de numerosos oficios artesáns en feiras de artesanía e entidades culturais.
As masterclasses do Serán'03 tratan cuestións peculiares ou moi especializadas de pandeireta, percusión e técnica vocal e están impartidas polo profesorado máis destacado do momento: Fransy González, Pau Santirso, María Xosé Martínez, Belén Mato, Vanesa Muela, Carmen Rey ou Livia Giaffreda. Podes ver o programa completo do encontro e os diferentes contidos formativos premendo AQUÍ.
