A Axencia para a Modernización Tecnolóxica de Galicia, en colaboración co Colexio Profesional de Enxeñería Técnica en Informática de Galicia (CPETIG), organiza un ano máis o Programa Scratch Day que celebra este ano a súa IX edición. A iniciativa busca derrubar mitos en torno á programación informática e espertar e fomentar vocacións no ámbito STEAM desde idades temperás.
A Cidade da Cultura de Galicia acolle o 19 de outubro a xornada final desta edición do programa, na que tamén terá lugar unha acción formativa específica para profesorado e formadores de centros de ensino. Trátase dunha iniciativa dirixida á rapazada de entre 7 e 15 anos, que ten como obxectivo amosar aos docentes as vantaxes de traballar e ensinar a través deste tipo de tecnoloxía, coa que poden incentivan a creatividade, o emprendemento e a capacidade de resolución de problemas.
Contidos do programa
Nesta edición os participantes nas xornadas terán que realizar tres videoxogos relacionados con deportes presentes nos Xogos Olímpicos. Nunha primeira fase, realizarase unha introdución aos videoxogos con Scratch e a continuación os asistentes poderán elaborar videoxogos relacionados con deportes olímpicos cos que a posteriori participar nunha competición.
As datas e aulas das xornadas son as seguintes:
- 21 de setembro – Guitiriz: https://cemit.xunta.gal/gl/formacion/formacion-presencial/47456
- 21 de setembro - Tomiño: https://cemit.xunta.gal/gl/formacion/formacion-presencial/47122
- 28 de setembro - Celanova: https://cemit.xunta.gal/gl/formacion/formacion-presencial/46998
- 5 de outubro - Fisterra: https://cemit.xunta.gal/gl/formacion/formacion-presencial/46995
- 19 de outubro - Edificio CINC Cidade da Cultura
