A asociación UVigo SpaceLab imparte o 5 de outubro no GaiásTech un breve curso de introdución ao estándar CubeSat, empregado cada vez máis nas misións espaciais. A xornada desenvolverase tanto de maneira presencial na Cidade da Cultura como con retransmisión por streaming.
Aprenderás sobre teoría orbital básica, terminoloxía e os diferentes subsistemas dun satélite, xunto cos retos e beneficios de levalo a órbita e operalo desde terra.
Programa
- Sistemas espaciais (motivación, vantaxes e desvantaxes, ...)
- Retos dun sistema espacial (condicións, materiais, órbitas, ...)
- Estándar Cubesat (orixe, formato, requisitos, ...)
- Subsistemas dun Cubesat (EPS, TTC, OBDH, ADCS, ...)
A asociación UVigo SpaceLab é un equipo de estudantes da Universidade de Vigo que se dedica ao deseño, fabricación e operación de pequenos satélites. Buscan poñer en práctica os coñecementos teóricos adquiridos durante a carreira a través do desenvolvemento de proxectos e misións espaciais a nivel nacional e internacional. Na actualidade, traballan na súa misión BIXO, un CubeSat 2 U que estudará como lle afecta a unha poboación bacteriana a exposición prolongada ao ambiente espacial.
