A Cidade da Cultura acolle o 18 de febreiro de 2022 a presentación do proxecto EDAR360, iniciativa posta en marcha por un consorcio de empresas e centros tecnolóxicos galegos co obxectivo de desenvolver solucións dixitais que permitan o control e a optimización dos procesos de depuración de augas residuais, favorecendo, deste xeito, a protección das masas de auga na nosa Comunidade.
A xornada, de asistencia gratuíta previa inscrición, desenvolverase no Auditorio Neira Vilas da Biblioteca de Galicia de 10 a 12 horas.
O proxecto EDAR360, conta cun orzamento total de 1.080.387,70 € e está liderado por Viaqua. Completan o consorcio, as empresas galegas de base tecnolóxica Syspro Automation S.L.U. e Ednon S.L. Este consorcio contará á súa vez coa colaboración dos centros de investigación Instituto Tecnolóxico de Galicia (ITG) e Cetaqua Galicia.
Este proxecto, enmarcado no programa Conecta Hubs 2021, está subvencionado pola Axencia Galega de Innovación e cofinanciado con cargo a Fondos FEDER no marco do programa operativo Feder Galicia 2014-2020, ademais de recibir o apoio da Vicepresidencia Segunda e da Consellería de Economía, Empresa e Innovación da Xunta de Galicia.
As solucións innovadoras desenvolvidas no marco deste proxecto, serán validadas en diferentes instalacións operadas por Viaqua a fin de garantir a replicabilidad dos resultados obtidos.
EDAR360 alíñase cun dos grandes retos estratéxicos do sector da auga marcado polas directrices europeas, acometendo a súa modernización a través do desenvolvemento de solucións tecnolóxicas dixitais que garantan unha óptima xestión do saneamento.
Para asistir á presentación e coñecer máis sobre o proxecto EDAR360 podes inscribirte aquí.
