A Xunta de Galicia presenta o 6 de setembro a Rede Galega de Tecnoloxías Cuánticas. O evento contará coa participación de diferentes membros da rede, entre os que se contan, ademais do Goberno galego, a Axencia Galega de Innovación, o Centro de Supercomputación de Galicia, o International Quantum Center de Fujitsu, o Centro de Tecnoloxías Fotónicas (AEPHOS), Gradiant, os Hubs de Innovación Dixital galegos, o Cluster TIC e as tres universidades públicas de Galicia.
O acto terá lugar no salón de eventos do Edificio Fontán, na Cidade da Cultura, o 6 de setembro a partir das 11:30 horas.
As tecnoloxías cuánticas aproveitan as leis da mecánica cuántica para dar lugar a innumerables aplicacións en medicina, medio ambiente, biotecnoloxía, aeronáutica, automoción, loxística, telecomunicacións, finanzas, etc. Presentan moitas facetas como novas formas de computación, avanzados sistemas de comunicación ou novidosos sensores.
Grazas ao seu potencial, agárdase que no futuro próximo sexan capaces de resolver problemas computacionais en menor tempo ou con menor consumo enerxético, obter mellores solucións a cuestións case intratables coa computación clásica tradicional e resolver os problemas de seguridade na transmisión da información.
