A Cidade da Cultura acolle o 12 de decembro a entrega dos premios do concurso Eduemprende Idea 2018. O acto contará coa presencia do conselleiro de Economía, Emprego e Industria, Francisco Conde, e da conselleira de Educación, Universidade e Formación Profesional, Carmen Pomar. A entrega dos premios será no auditorio 1 do Edificio CINC.
O concurso Eduemprende Idea 2018 diríxese ao alumnado das ensinanzas de formación profesional, deportivas ou de artes plásticas e deseño da Comunidade Autónoma de Galicia sostidas con fondos públicos. O obxectivo é potenciar a realización de proxectos empresariais por parte dos estudantes dos ciclos de grao superior e de grao medio.
Para cada unha das dúas modalidades do concurso repartiranse 3 premios, cunha dotación económica de 3.000 euros para o primeiro clasificado, 2.000 euros para o segundo, e 1.000 euros para o terceiro. Ademais, os gañadores poderán incorporarse a un viveiro de empresa da Xunta de Galicia e recibirán asesoramento técnico por parte do IGAPE.
