A Consellería de Economía, Emprego e Industria, consciente da importancia social, patrimonial e económica da artesanía galega, aposta por un sector artesán forte e capaz de adaptarse ás novas tendencias.
A Fundación Centro Galego da Artesanía e do Deseño, dependente da Dirección Xeral de Comercio e Consumo da Consellería de Economía, Emprego e Industria, organizou os Premios Artesanía de Galicia 2017, establecendo as seguintes modalidades:
1. Premio Artesanía de Galicia 2017
2. Premio Traxectoria 2017
3. Premio Bolsa Eloy Gesto 2017
1. Premio Artesanía de Galicia 2017
Premia a obra que representa as liñas desexadas para unha artesanía competitiva no mercado actual como son o deseño, a adaptación ou conservación das técnicas e valores tradicionais máis característicos da nosa artesanía, a incorporación ás tendencias actuais, a innovación, a boa presentación e a calidade da obra tanto nos seus materiais como no desenvolvemento da mesma.
Dotación de 6.000 € e trofeo acreditativo
2. Premio Traxectoria 2017
Premio honorífico en recoñecemento á traxectoria profesional consolidada dun/dunha artesán/á galega/o. O premio concédese tendo en conta as propostas dos obradoiros artesanais inscritos no Rexistro Xeral de Artesanía, asociacións profesionais de artesáns, ou outros entes públicos e privados que manteñan relación coa artesanía de Galicia, encargadas de facer a presentación das candidaturas. Valorase a traxectoria recoñecida da/o candidata/o, a súa contribución, posta en valor e promoción da artesanía
galega, a calidade dos seus traballos realizados e o compromiso coa divulgación e transmisión pedagóxica dos principais valores positivos no eido da nosa artesanía.
Sen dotación económica e trofeo acreditativo.
3. Premio Bolsa Eloy Gesto 2017
Premia a candidatura que presenta unha proposta para a súa formación nun centro de referencia no eido da artesanía e o deseño. Valórase o carácter innovador do proxecto, a transferencia de coñecemento que se pretende acadar con esa formación, a incorporación das novas tecnoloxías, o curriculum da persoa candidata, e a potencialidade de incorporación deste formación para a elaboración dun produto artesanal innovador.
Bolsa de formación de 4.000 € e diploma acreditativo.
